Habang may buhay ay may pag-asa, ito ang paniniwala ng karamihan sa atin. Ngunit para kay Eufemio Kagatlabi, ang kasabihang ito ay mapapatunayan nyang kalokohan lamang.
Huli na ang kalokohang ito para paniwalaan, huli na ang lahat dahil sya ay nasa bingit na ng kamatayan nang ito'y kanyang naliwanagan. At kung maibabalik nya lang ang panahon hindi na sana sya sumubok na maniwala sa kasabihan ito.
Natuklasan ni Eufemio na kalokohan ang maniwala sa kasabihang ito habang sya ay tulala sa ibabaw ng isang malaki at matayog na karatula sa EDSA. Nakamasid sya sa mga usesero at sasakyan sa EDSA na nagmistulang mga langgam na naggigitgitan.
Sa pagnanais nya na mapansin rin gaya nung taong balak magpakamatay dati ngunit dahil pinangakuan ng tulong ng isang ahensya ng gobyerno ay di na ito tumalon at nagkaroon pa ng pag-asa sa buhay.
Ngunit kabaliktaran ang nangyari kay Eufemio Kagatlabi dahil mga tanod lamang at mga tambay sa halip na mga taong makapangyarihan ang sumaklolo sa kanya. Naghintay sya ng mahigit tatlong oras sa tuktok ng karatula kahit pinabababa sya ng marami para hwag nang humantong sa sakuna.
"Bumaba ka na dyan utoy!", Sabi ng batanggenyong tanod at nagpatuloy sa paliwanag nito, "baka mahulog ka dyaan, matutulongan ka namin sa problema mo utoy, sabihin mo lang".
Sa narinig nyang ito ay napaisip na si Eufemio sa mangyayari at sa loob-loob nya, aba! eto na ang kasagutan ng mga problema ko baka may katungkulan sa gobyerno itong taong ito. Hindi muna ako bababa hangga't hindi maliwanag ang ipapangako sa akin. Ang kailangan lang ay hindi dapat magmula sa akin at sila mismo ang mag-alok. Kaya hindi nya muna kinagat ang sinabi nito baka mahalata na wala talaga syang planong tumalon kaya gusto niya munang malaman ang tulong na maibibigay sa kanya.
"Wala akong paki-alam, tumabi kayo dyan kundi tatalon ako." Sumagot si Eufemio na may pananakot.
Dahil sa nga sagot nya, nagmarunong naman ang isang tanod na si Kuya Toto dahil minsan daw ay nakaranas na syang sumagip ng buhay ng isang nais magpakamatay. Kaya naman hiningi nito ang megaphone sa batanggenyong tanod at nagsalita.
"Anong pangalan mo utoy? Pera ba?" Tanong nito. "Mabibigyan kita, bumaba ka lang dyan. Hindi ka namin matutulungan kung nandyan ka sa taas." Sabay nagyabang si Kuya Toto sa mga kasamahan, "Ganyan makipag-usap sa taong gustong magpakamatay pare."
Gusto sana ni Eufemio na maniwala sa mga ito, ngunit nagdududa sya dahil nagbubulungan ang mga ito sa baba at wala pang binaggit na tulong ang mga ito kundi pera. Hindi lang kasi pera ang hinahangad ni Eufemio kundi maganda at marangal na trabaho.
"Utoy po!" Sigaw ni Eufemio. "Utoy po ang pangalan ko."
"Kita mo na pare?" Pagmamayabang ni Kuya Toto sa kasamahan sa baba. "Dahil sumagot si Utoy sa tanong ko, magkakaroon na ng resulta ang usapang ito."
Hawak-hawak ni Kuya Toto ang megephone at nagsalita na tipong dalubhasa sa ganitong gawain.
"Utoy, anong kelangan mo para bumaba ka dyan?" Tanong uli ni Kuya Toto.
"Wala! Wala akong kailangan, gusto ko lang magpakamatay dahil sa kahirapan! Kung gusto mong makatulong, pabayaan nyo na ako." Sigaw ni Eufemio.
Nagpasya ng tumawag ng pulis at bombero ang mga tanod dahil sa katigasan ng ulo ni Eufemio. Marami ang nangyari sa tatlong oras na paghihitay ni Eufemio sa Otoridad, isa na rito ang pakikialam ng mga istambay at mga traysikel drayber. Habang nagsisigawan ang lahat na bumaba na sya, iba naman ang ginagawa ng mga drayber sapagka't tila nagpupustahan ang mga ito sa kahihinatnan.
Isang tao ang simigaw na nakababahala para kay Eufemio dahil minura sya ng mga ito. Sunod-sunod ang sigaw na tila may pagbabanta at tumatawa ang mga ito. Sa una ay tila pabiro pa ito ngunit kinalaunan ay seryoso na.
"Putang ina mo, bumaba ka dyan matatalo ako sa yo eh!!" Sigaw ni Tonyo na drayber ng traysikel.
Dahil wala ang mga tanod, biglang may nagkaron ng interes at sumali sa pustahan. Pagkaraan ng ilang minutong pakikipag-usap sa isa pang istambay na tinatawag nilang si Ambo, nahimok itong pumusta na tatalon si Utoy sa halagang bente pesos. Samakatuwid, sumigaw naman ito na tumalon na nga si Eufemio.
"Tatalon yan pare, kita mo naman ang sagot kanina." Pagtiyak ni Ambo sa kapustahang si Tonyo.
Hindi pa rin dumating ang mga pulis at mga bombero para magmatyag sa kinikilos ni Eufemio. Dumagdag pa sa kaguluhan si Maning na isang lasenggo sa kanto ngunit bago ito sumali sa pustahan ay kumuha muna ito ng megaphone sa kanila at kinausap si Eufemio.
"Hoy, Utoy. Tumalon ka na ngayon bago dumating ang mga pulis, babarilin ka ng mga yon" Sabi ni Lasenggong Maning. "Magagalit sayo ang mga yon, umakyat-akyat ka dyan tapos hindi ka tatalon, naku! Mapipikon sayo ang mga yon."
Pagkatapos ng sinabi ni Maning ay nagpustahan naman ang mga istambay na nakamasid sa ipinakitang pagkabalisa ni Eufemio. Kaya naman pumusta ang ibang istambay na tatalon sya. At ang iba naman na nag-aalaala sa kahihinatnan ay sinaway ang mga istambay at drayber sa kanilang pagpupustahan. Ngunit hindi pa man natapos sa pagsaway sa kanila ng ibang mamamayan ay sumigaw na naman itong si Maning kaya nagkaruon ng pagtatalo sa lahat ng nasa baba.
"Hoy Utoy, Kung hindi ka tatalon dyan papatayin kita!" Hiyaw ni Maning.
"Hoy Maning! Tumigil ka dyan! Kung may mangyari sa batang yan, ikaw ang ipapakulong namin! Sabi ng isang Ale na nagtitinda ng sigarilyo sa kanto.
"Tita, walang ibang sisisihin dyan kundi sarili nya dahil umakyat sya dyan." Pangatwiran ni Maning.
"Eh para mo na ring itinulak ang batang yan kung tatalon yan."
Nagpatuloy sa pagpalitan ng mga katuwiran ang mga usesero at lumalaki na rin ang mga ipinusta ng mga ito. Ang isa sa drayber ay pinusta na ang kanyang traysikel, kaya walang nagawa si Eufemio kundi timbangin ang dumagdag na tensyon. Hindi na alam ni Eufemio kung ano ang gagawin dahil kung titimbangin, meron talagang matatalo sa sugal. Kung tatalon sya, patay sya pagbagsak nya. At kung hindi naman sya tatalon, papatayin sya ng mga ito dahil matatalo.
![[info]](http://l-stat.livejournal.com/img/userinfo.gif?v=92.1){kind=small}
crazy
